Pòtoprens, Mèkredi 2 avril 2025 – Yon foul moun te pran lari jodi Mèkredi 2 avril la nan yon mobilizasyon yo batize “Mèkredi Nwa”. Anpil manifestan, abiye an nwa, soti nan tout kwen kapital la: Kanapevè, Kriswa, Petyonvil, Tijo, Delma, ak plizyè lòt zòn ki viktim de ensekirite a. Pankat nan men, branch bwa, wòch, boutèy, yo ap mande sekirite epi egzije Leta reprann kontwòl teritwa pèdi yo.
Yon Mouvman Ki Frape Kapital la
Depi byen bonè nan maten, plizyè katye leve kanpe, ata moun ak beki te pran lari! Plizyè enstitisyon, biznis, bank, elatriye… te oblije fèmen pòt yo. Afich ak mesaj klè t ap flote nan tout lari a: “Nou Bouke! Nou bezwen Sekirite!”, “Nou Bouke Viv Nan Laperèz!”, “Bandi Pa Dwe Dirije Nou!”.
Manifestan yo akize otorite yo de konplisite ak gang yo, ki kite katye popilè yo sou kontwòl bandi pandan yo fèmen je yo sou sitiyasyon an. Manifestan yo eksprime fristrasyon yo ak anpil eslogan ki fè lari a tranble: “ABA VOLÈ!”, “ABA KORIPSYON!”, “ABA GANG!”
Lapolis ap fè presyon, men pèp la kanpe dan!
Malgre prezans polis nasyonal, fòs lame, ak misyon etranje a, manifestan yo franchi tout baryè pou rive jiska Primati. Lapolis eseye repouse yo ak gaz lakrimojèn, men pèp la pa repliye, yo pa fè bak! Nan Boudon ak Delma, kout zam chante, men manifestasyon an kontinye pi rèd.
“Nou pa ka pè moun k ap defann volè!” – yon manifestan lanse ak raj.
Reyaksyon fòs lòd yo mete plis kòlè nan kè pèp la. Plizyè moun denonse sa yo rele yon “fòs lòd san fòs”, ki pi vit pou kraze manifestasyon pasifik pase pou yo ratibwaze gang yo.”Lè se nou, yo ban nou gaz, men bandi yo, yo kite yo mache lib!” – yon lòt manifestan deklare. Aprè gwo mouvman sa a, ki solisyon konkrè gouvènman anplas la dwe pran pou fini ak ensekirite a epi reprann kontwòl teritwa pèdi yo ?
