Pòtoprens – “Task Force” se yon inite espesyal, ki gen ladann ajan sekirite Premye Minis la (USPM) ak ajan sekirite Jeneral Palè Nasyonal la (USGPN), ke Primati a ak KPT a fèk kreye pou lite kont gang yo epi reprann kontwòl kapital la ki sou wout pèdi. Fòs lòd sa a te lanse de gwo operasyon pandan wikenn 1, 2 mas 2025 lan.
Yon gwo operasyon nan fyèf Babekyou
Samdi 1e mas nan aprè midi, “Task Force” te lanse yon gwo operasyon nan zòn anba Delmas, kote gang Jimmy Chérizier, alyas “Barbecue”, ki se lidè koalisyon kriminèl ViV Ansanm, ap domine. Plizyè manm gang sa a pèdi lavi yo pandan atak la. Premye Minis Alix Didier Fils-Aimé konfime epi deklare: “Wi, te gen yon atak. Plizyè bandi mouri.”
Daprè otorite yo, operasyon an te fèt sou kòmandman enspektè jeneral Vladimir Paraison, chèf Konsèy Siperyè Polis Nasyonal la (CSPN). Fòs Primati a ansanm ak Palè Nasyonal la mete tèt ansanm pou reyalize misyon sa a, ki se yon pati nan jefò yo pou konbat ensekirite k ap taye banda nan kapital la.
“Task Force” te atake Izo nan Vilaj la
Dimanch 2 mas nan aswè, yon lòt gwo chèf gang, Izo 5 Segond, t ap òganize yon “kanaval” nan zòn Matisan, kote gwoup gang li yo ta pral byen pase. Nan menm moman sa a, otorite yo te sèvi ak dwonn eksplozif pou atake pozisyon yo, e plizyè manm gwoup sa a te pèdi lavi yo nan eksplozyon an. Daprè yon videyo k ap sikile sou rezo sosyal yo, ta sanble atak la te frape, chèf gang lan, “Izo 5 Segond”.
Yon sitiyasyon ki toujou kritik
Malgre jefò “Task Force” la, ensekirite a rete yon gwo menas pou popilasyon an. Gang yo kontinye gen kontwòl sou plizyè katye, pandan y ap simen laperèz ak zak vyolans tankou asasinay ak destriksyon nan kapital la.
Malgre limit li, atak “Task Force” la sou gang yo montre yon angajman klè bò kote otorite yo pou reprann kontwòl kapital la. Pami nouvo mezi sa yo, gen yon ogmantasyon nan operasyon militè ak entèdiksyon trafik zam ki te rive akselere nan dènye semèn sa yo. Eske gwo operasyon sa yo ap kontinye nan lòt zòn ki anba men bandi yo? Eske nouvo fòs lòd sa a ap resi ede popilasyon an rale yon ti souf?
